Regolament 169. Sistema ta’ kwalifika tal-operaturi ekonomiċi

(1) L-entitajiet kontraenti li hekk jixtiequ, wara li jiksbu l-approvazzjoni bil-miktub tad-Direttur minn qabel, jistgħu jistabbilixxu u jħaddmu sistema ta’ kwalifika tal-operaturi ekonomiċi.

(2) L-entitajiet kontraenti li, wara li jkunu kisbu l-approvazzjoni bil-miktub tad-Direttur minn qabel, jistabbilixxu jew iħaddmu sistema ta’ kwalifika għandhom jiżguraw li fil-ħin kollu l-operaturi ekonomiċi jistgħu jitolbu kwalifika.

(3) Is-sistema ta’ kwalifika tista’ tinvolvi stadji ta’ kwalifika differenti.

(4) L-entitajiet kontraenti għandhom jistabbilixxu regoli u kriterji oġġettivi ta’ esklużjoni u l-għażla ta’ operaturi ekonomiċi li jitolbu kwalifika u kriterji u regoli oġġettivi għat-tħaddim tas-sistema ta’ kwalifika, li jkopru suġġetti bħal l-iskrizzjoni fis-sistema, l-aġġornar perjodiku tal-kwalifiki, f’każ li jkun hemm, u t-tul ta’ żmien tas-sistema.

(5) Fejn dawk il-kriterji u r-regoli jinkludu speċifikazzjonijiet tekniċi, għandhom japplikaw id-dispożizzjonijiet tar-regolamenti 76 sa 78. Il-kriterji u r-regoli jistgħu jiġu aġġornati kif meħtieġ.

(6) Il-kriterji u r-regoli msemmija fis-subregolamenti (3) sa (5) għandhom jitqiegħdu għad-dispożizzjoni tal-operaturi ekonomiċi fuq talba tagħhom. Dawk il-kriterji u r-regoli aġġornati għandhom jiġu kkomunikati lill-operaturi ekonomiċi interessati.

(7) Fejn entità kontraenti tqis li s-sistema ta’ kwalifika ta’ ċerti entitajiet jew korpi oħra tissodisfa r-rekwiżiti tagħha, hi għandha tikkomunika lill-operaturi ekonomiċi interessati l-ismijiet ta’ dawk l-entitajiet jew korpi oħra.

(8) Meta sejħa għal kompetizzjoni ssir permezz ta’ avviż tal-eżistenza ta’ sistema ta’ kwalifika, għandhom jingħataw kuntratti speċifiċi għax-xogħlijiet, il-provvisti jew is-servizzi koperti mis-sistema ta’ kwalifika permezz ta’ proċeduri ristretti jew proċeduri nnegozjati, li fihom l-offerenti u l-parteċipanti kollha jintgħażlu minn fost il-kandidati diġà kkwalifikati skont din is-sistema.

(9) Kwalunkwe spiża li tiġi addebitata b’rabta mat-talbiet għall-kwalfika jew mal-aġġornar jew il-konservazzjoni ta’ kwalifika diġà miksuba skont is-sistema għandha tkun proporzjonata għall- ispejjeż iġġenerati.

(10) Fejn l-entitajiet kontraenti jagħżlu li jistabbilixxu sistema ta’ kwalifiki skont dan ir-regolament, is-sistema għandha tkun is-suġġett ta’ avviż kif imsemmi fl-Iskeda 20, li jindika l-għan tas-sistema ta’ kwalifiki u kif għandu jsir aċċess għar-regoli rigward it-tħaddim tagħha.

(11) Entitajiet kontraenti għandhom jindikaw il-perjodu ta’ validità tas-sistema ta’ kwalifiki fl-avviż dwar l-eżistenza tas-sistema. Huma għandhom jinnotifikaw lill-Uffiċċju tal-Pubblikazzjonijiet tal-Unjoni Ewropea dwar kwalunkwe bidla fil-perjodu ta’ validità, billi jużaw il-formoli standard li ġejjin:

(12) Għandu jinżamm rekord bil-miktub ta’ operaturi ekonomiċi kkwalifikati; dan jista’ jinqasam f’kategoriji skont it-tip ta’ kuntratt li għalih tkun valida l-kwalifika.