Regolament 13. Funzjonijiet addizzjonali fir-rigward ta’ akkwisti pubbliċi ’l fuq minn ċerti limiti

(a) li jistabbilixxi u japprova l-kondizzjonijiet ġenerali tad-dokumenti tal-offerta;

(b) li jawtorizza diverġenzi minn patti u kondizzjonijiet standard skont ir-regolamenti hawn stabbiliti u li jistgħu jiddaħħlu fid-dokumenti tal-offerti;

(ċ) li japprova estensjonijiet fil-perijodu jew il-kanċellament ta’ proċedura ta’ offerti;

(d) li jordna li jittawwal il-perijodu għall-għemil ta’ offerti fil-każ ta’ xi sejħa għal offerti msemmija f’dawn ir-regolamenti jekk huwa jqis li dik l-estensjoni tkun ġustifikata fiċ-ċirkustanzi tal-każ;

(e) li jifli u japprova, b’xi tibdil jew mingħajru, dokumenti tal-offerti, qabel ma dawn jinħarġu u jiġu pubblikati;

(f) li japprova, meta jkun meħtieġ skont dawn ir-regolamenti, modifiki li jkunu jeċċedu l-ammont stabbilit fir-regolament 246(3);

(g) li japprova talbiet magħmula minn awtoritajiet kontraenti għal estensjonijiet fil-perijodu kemm idumu l-kuntratti jekk huwa jqis li ċ-ċirkustanzi jkunu hekk jitolbu fl-interess pubbliku u jsiru dispożizzjoniiet speċifiċi dwar dawk l-estensjonijiet fid-dokument tal-offerta;

(h) li jidentifika u jimplimenta mezzi adatti biex ikun jista’ jissorvelja l-eżekuzzjoni kif suppost ta’ kuntratti;

(i) li jagħmel regolamenti biex jingħataw kuntratti f’isem u għan-nom ta’ awtoritajiet kontraenti elenkati fl-Iskeda 2, inkluż il-każ ta’ assoċjazzjoni ta’ awtoritajiet li tagħhom l-awtorità kontraenti tkun membru;

(j) li jistabbilixxi l-proċedura li taffettwa l-għoti ta’ kuntratti regolati bil-proċeduri li jkunu diverġenti minn dawn ir-regolamenti sakemm dawn il-proċeduri jiġu ppubblikati b’avviż fil-Gazzetta;

(k) li jippubblika fil-Gazzetta avviż dwar l-għotjiet kollha ta’ offerti inklużi l-varjazzjonijiet barra mil-limiti tal-kondizzjonijiet tal-offerta, fi żmien sitt xhur mill-għoti tagħhom;

(l) li jaġġudika offerti u jiffirma kuntratti f’isem u għan-nom ta’ awtoritajiet kontraenti skont kif jipprovdu dawn ir-regolamenti;

(m) li jieħu miżuri xierqa biex jiżgura li fit-twettiq ta’ kuntratti pubbliċi operaturi ekonomiċi josservaw l-obbligi applikabbli fl-oqsma tal-ambjent, id-dritt soċjali u dwar ix-xogħol stabbilit bil-liġi tal-Unjoni. il-liġi nazzjonali, ftehim kollettivi jew b’dispożizzjonijiet dwar liġi internazzjonali dwar l-ambjent u liġi soċjali u dwar ix-xogħol elenkati fl-Iskeda 13; u

(n) jħejji u jibgħat lill-Ministru rapport, mhux iktar tard minn sitt xhur wara l-għeluq ta’ kull sena finanzjarja, dwar l-prestazzjoni tal-Kumitat Ġenerali tal-Kuntratti, u tal-Kumitat Speċjali tal-Kuntratti matul is-sena finanzjarja li dwarha jsir ir-rapport, liema rapport għandu, b’mod partikolari, jipprovdi dettalji dwar ir-riżultati tal-attivitajiet ta’ monitoraġġ: Iżda, wara li r-rapport jintbagħat lill-Ministru, id-Direttur għandu jiżgura li r-rapport jiġi ppubblikat.