L.S. 601.03 · Taqsima I · Dispożizzjonijet Ġenerali
Regolament 26. Akkwist imħallat
Akkwist Imħallat
(1) Kuntratti li jirrigwardaw żewġ tipi ta’ akkwisti jew iżjed, kemm jekk ikunu xogħlijiet, servizzi jew provvisti, li lkoll huma koperti b’dawn ir-regolamenti, għandhom jingħataw f’konformità mad-dispożizzjonijiet applikabbli għat-tip ta’ akkwist li jikkaratterizza s-suġġett ewlieni tal-kuntratt inkwistjoni.
(2) Fil-każ ta’ kuntratti mħallta li jirrigwardaw tipi differenti ta’ akkwisti, li lkoll huma koperti b’dawn ir-regolamenti, li jikkonsistu parzjalment f’servizzi fis-sens tar-regolament 162 u parzjalment f’servizzi oħra jew f’kuntratti mħallta li jikkonsistu parzjalment f’servizzi u parzjalment fi provvisti, is-suġġett prinċipali tal-akkwisti jiġi determinat skont liema mill-valuri stmati tas-servizzi jew provvisti rispettivi, hu l-ogħla.
(3) F’każijiet ta’ kuntratti mħallta li jirrigwardaw akkwisti koperti b’dawn ir-regolamenti u akkwisti koperti minn reġimi legali oħra u fejn il-partijiet differenti ta’ kuntratt partikolari jistgħu jiġu separati oġġettivament għandu japplika dan li ġej:
(a) awtoritajiet kontraenti jistgħu jagħżlu li jagħtu kuntratti separati għall-partijiet separati jew jagħtu kuntratt uniku. Fejn l-awtoritajiet kontraenti jagħżlu li jagħtu kuntratti separati għal partijiet separati, id-deċiżjoni dwar liema reġim legali japplika għal kwalunkwe wieħed minn tali kuntratti separati għandha tittieħed abbażi tal-karatteristiċi tal-parti separata kkonċernata;
(b) fejn l-awtoritajiet kontraenti jagħżlu li jagħtu kuntratt uniku, dawn ir-regolamenti għandhom, dment li ma jkunx previst mod ieħor fir-regolament 27, japplikaw għall-kuntratt imħallat li jirriżulta, irrispettivament mill-valur tal-partijiet li kieku jaqgħu taħt reġim legali differenti u irrispettivament mil-liema reġim legali li dawk il-partijiet kienu jkunu soġġetti għalihom;
(ċ) f’każ ta’ kuntratti mħallta li jkun fihom elementi ta’ kuntratti ta’ provvista, xogħlijiet u servizzi u ta’ konċessjonijiet, il-kuntratt imħallat għandu jingħata skont dawn ir-regolamenti, sakemm il-valur stmat tal-parti tal-kuntratt li tikkostitwixxi kuntratt kopert b’dawn ir-regolamenti, ikkalkulat skont ir-regolamenti 28, 29, 30, 31 u 32, hu ugwali jew akbar mil-limitu rilevanti stipulat fl-Iskeda 5.
(4) Fil-każ ta’ kuntratti li għandhom bħala s-suġġett tagħhom kemm l-akkwist kopert b’dawn ir-regolamenti kif ukoll l-akkwist għall-eżerċitar ta’ attività li hija soġġetta għar-Regolamenti dwar Akkwist Pubbliku ta’ Entitajiet li joperaw fis-Setturi tas-Servizzi tal-Ilma, l-Enerġija, it-Trasport u Postali, ir-regoli applikabbli għandhom, minkejja d-dispożizzjonijiet tas-subregolament (3) ta’ dan ir-regolament, jiġu determinati skont ir-regolamenti 5 u 6 tar-Regolamenti tal-2016 dwar Akkwist Pubbliku ta’ Entitajiet li joperaw fis-Setturi tas-Servizzi tal-Ilma, l-Enerġija, it-Trasport u Postali.
(5) Meta l-partijiet differenti ta’ kuntratt partikolari huma oġġettivament mhux separabbli, ir-reġim legali applikabbli għandu jkun iddeterminat abbażi tas-suġġett ewlieni ta’ dak il-kuntratt.
Imsemmi fil-marġniL.S. 601.05
Referenzi
Jirreferu għalih
Skedi li jirreferi għalihom
Regolament ta’ qabel
25 — Akkwisti pubbliċi li jinvolvu awtoritajiet kontraenti minn Stati Membri differenti
Regolament li jmiss
27 — Akkwist imħallat li jinvolvi aspetti ta’ difiża jew sigurtà
Trid li d-dokumenti tal-offerti tiegħek jiġu vverifikati qabel il-pubblikazzjoni? Nuruk kif tagħmel dan Procurelex Verifika.
Itlob dimostrazzjoniInformazzjoni ġenerali dwar ir-Regolamenti dwar l-Akkwist Pubbliku fis-seħħ. Mhijiex parir legali.