Regolament 154. Kuntratti pubbliċi ta’ servizzi

(a) meta ma jkunux ġew sottomessi offerti jew offerti adatti jew talbiet għal parteċipazzjoni jew talbiet għal parteċipazzjoni mhux adatti f’rispons għal proċedura miftuha jew proċedura ristretta, sakemm il-kondizzjonijiet inizjali tal-kuntratt ma jkunux mibdula sostanzjalment u sakemm jintbagħat rapport lill-Kummissjoni meta hija titlob li jsir dan; jew

(b) fejn is-servizzi jistgħu jiġu fornuti minn operatur ekonomiku partikolari biss minħabba xi waħda mir-raġunijiet li ġejjin:

(i) l-għan tal-akkwist huwa l-ħolqien jew l-akkwist ta’ xogħol artistiku uniku jew prestazzjoni artistika unika;

(ii) ma jkunx hemm kompetizzjoni minħabba raġunijiet tekniċi;

(iii) il-protezzjoni ta’ drittijiet esklużivi, inkluż drittijiet ta’ proprjetà intellettwali: Iżda l-eċċezzjonijiet stabbiliti fis-subparagrafi (ii) u (iii) għandhom japplikaw biss meta ma teżistix alternattiva jew sostitut raġonevoli u n-nuqqas ta’ kompetizzjoni mhijiex konsegwenza ta’ limitazzjoni artifiċjali fil-parametri tal-akkwist; jew

(ċ) sa fejn huwa strettament neċessarju fejn, għal raġunijiet ta’ urġenza kbira dovuta għal avvenimenti li ma setgħux ikunu previsti mill-awtorità kontraenti, il-limiti ta’ żmien għal proċeduri miftuħa jew ristretti jew kompetittivi bin-negozjar ma jistgħux jiġu rispettati. Iċ-ċirkustanzi invokati għall-ġustifikazzjoni tal-urġenza estrema qatt ma għandhom ikunu attribwibbli għall-awtorità kontraenti; jew

(d) għal servizzi ġodda li jikkonsistu fir-ripetizzjoni ta’ servizzi simili fdati lill-operatur ekonomiku li ngħata kuntratt oriġinali mill-istess awtoritajiet kontraenti, sakemm dawn ix-xogħlijiet huma konformi ma’ proġett bażiku li għalih ingħata l-kuntratt oriġinali skont proċedura li għaliha ġiet ippubblikata sejħa għal kompetizzjoni b’konformità ma’ dawn ir-regolamenti; jew

(e) għal kuntratti pubbliċi ta’ servizzi, fejn il-kuntratt ikkonċernat jiġi wara kompetizzjoni ta’ disinn organizzata skont dawn ir-regolamenti u għandu jingħata, skont ir-regoli previsti fil-kompetizzjoni ta’ disinn, lir-rebbieħ jew lil wieħed mir-rebbieħa tal-kompetizzjoni ta’ disinn; f’dan l-aħħar każ, ir-rebbieħa kollha għandhom jiġu mistiedna sabiex jieħdu sehem fin-negozjati; jew

(f) għax-xiri ta’ servizzi b’termini partikolarment vantaġġjużi, jew mingħand fornitur li qed jagħmel stralċ definittiv tal-attivitajiet ta’ negozju tiegħu, jew il-likwidatur fi proċedura ta’ insolvenza, arranġament mal-kredituri, jew proċedura simili taħt il-liġijiet jew ir-regolamenti nazzjonali.

(a) Jekk il-proċedura negozjata tintuża biex titwettaq ripetizzjoni ta’ xogħlijiet simili, il-proġett baziku għandu jindika sa liema punt jistgħu jaslu x-xogħlijiet addizzjonali possibbli u l-kondizzjonijiet li taħthom ser jingħataw.

(b) Hekk kif l-ewwel proġett jinħareġ għall-offerti, l-użu possibbli ta’ din il-procedura għandu jiġi divulgat u l-awtoritajiet kontraenti għandhom jieħdu f’kunsiderazzjoni l-istima tal-ispiża totali tas-servizzi sussegwenti meta japplikaw il-limiti stabbiliti fl-Iskeda 5.

(ċ) Il-proċedura negozjata għal ripetizzjoni ta’ xogħlijiet simili tista’ tintuża biss matul it-tliet snin wara li jintemm il-kuntratt oriġinali.