Regolament 153. Kuntratti pubbliċi ta’ provvisti

(a) meta ma jkunux ġew sottomessi offerti jew offerti adatti jew talbiet għal parteċipazzjoni jew talbiet għal parteċipazzjoni mhux adatti f’rispons għal proċedura miftuha jew proċedura ristretta, sakemm il-kondizzjonijiet inizjali tal-kuntratt ma jkunux mibdula sostanzjalment u sakemm jintbagħat rapport lill-Kummissjoni meta hija titlob li jsir dan; jew

(b) fejn il-provvisti jistgħu jiġu fornuti minn operatur ekonomiku partikolari biss minħabba xi waħda mir-raġunijiet li ġejjin:

(i) l-għan tal-akkwist huwa l-ħolqien jew l-akkwist ta’ xogħol artistiku uniku jew prestazzjoni artistika unika;

(ii) ma jkunx hemm kompetizzjoni minħabba raġunijiet tekniċi;

(iii) il-protezzjoni ta’ drittijiet esklużivi, inkluż drittijiet ta’ proprjetà intellettwali: Iżda l-eċċezzjonijiet stabbiliti fis-subparagrafi (ii) u (iii) għandhom japplikaw biss meta ma teżistix alternattiva jew sostitut raġonevoli u n-nuqqas ta’ kompetizzjoni mhijiex konsegwenza ta’ limitazzjoni artifiċjali fil-parametri tal-akkwist; jew

(ċ) sa fejn huwa strettament neċessarju fejn, għal raġunijiet ta’ urġenza kbira dovuta għal avvenimenti li ma setgħux ikunu previsti mill-awtorità kontraenti, il-limiti ta’ żmien għal proċeduri miftuħa jew ristretti jew kompetittivi bin-negozjar ma jistgħux jiġu rispettati. Iċ-ċirkustanzi invokati għall-ġustifikazzjoni tal-urġenza estrema qatt ma għandhom ikunu attribwibbli għall-awtorità kontraenti; jew

(d) fejn il-prodotti involuti jkunu manifatturati purament għall-finijiet ta’ riċerka, esperimentazzjoni, studju jew żvilupp; madankollu, kuntratti mogħtija skont dan il-paragrafu ma għandhomx jinkludu l-produzzjoni ta’ kwantità sabiex tiġi stabbilita l-vijabbiltà kummerċjali jew sabiex jiġu rkuprati l-ispejjeż tar-riċerka u l-iżvilupp; jew

(e) għal konsenji addizzjonali mill-fornitur oriġinali li huma maħsuba jew bħala sostituzzjoni parzjali ta’ provvisti jew stallazzjonijiet jew inkella bħala estensjoni ta’ provvisti jew stallazzjonijiet eżistenti fejn bidla fil-fornitur tkun tobbliga lill-awtorità kontraenti li tikseb provvisti li għandhom karatteristiċi tekniċi differenti li jirriżultaw f’inkompatibbiltà jew diffikultajiet tekniċi sproporzjonati fit-tħaddim u l-manutenzjoni; bħala regola ġenerali, il-perjodu ta’ dawn il-kuntratti kif ukoll dak tal-kuntratti rikorrenti ma għandux jaqbeż it-tliet snin; jew

(f) għal provvisti kkwotati u mixtrija f’suq tal-prodotti bażiċi; jew

(g) għax-xiri ta’ provvisti b’termini partikolarment vantaġġjuzi, jew mingħand fornitur li qed jagħmel stralċ definittiv tal-attivitajiet ta’ negozju tiegħu, jew il-likwidatur fi proċedura ta’ insolvenza, arranġament mal-kredituri, jew proċedura simili taħt il-liġijiet jew ir-regolamenti nazzjonali.