Regolament 27. Proċedura negozjata bil-publikkazzjoni ta’ avviż ta’ kuntratt

(1) Fil-proċeduri negozjati bil-pubblikazzjoni ta’ avviż ta’ kuntratt, l-awtoritajiet jew entitajiet kontraenti għandhom jinnegozjaw l-offerti flimkien mal-offerent sabiex jiġu adattati għar-rekwiżiti li huma jkunu indikaw fl-avviż ta’ kuntratt, fid-dokumenti tal-kuntratt u fid-dokumenti ta’ sostenn, jekk ikun hemm, u sabiex jiddeterminaw l-aħjar offerta konformement mar-reglament 48.

(2) Matul in-negozjati, l-awtoritajiet jew entitajiet kontraenti għandhom jiżguraw l-ugwaljanza ta’ trattament bejn l-offerenti kollha. B’mod partikolari, m’għandhomx jagħtu, b’mod diskriminatorju, informazzjoni li tista’ tagħti vantaġġ lil uħud mill-offerenti fuq oħrajn.

(3) L-awtoritajiet jew entitajiet kontraenti jistgħu jipprevedu li l-proċedura negozjata ssir f’fażijiet suċċessivi sabiex jitnaqqas in-numru ta’ offerti li jridu jiġu nnegozjati billi japplikaw il-kriterji tal-għoti stipulati fl-avviż ta’ kuntratt jew fid-dokumenti tal-kuntratt. L-avviż ta’ kuntratt jew id-dokumenti tal-kuntratt għandhom jindikaw jekk sarx jew le użu minn din il-fakultà.