Regolament 175. Varjanti

(1) Għal offerti li jkollhom valur stmat li jaqa’ taħt ir-regolament 30(1)(b), l-entitajiet kontraenti jistgħu jawtorizzaw jew jeżiġu l-offerenti jissottomettu varjanti li jilħqu r-rekwiżiti minimi speċifikati mill-entitajiet kontraenti.

(2) Fid-dokumenti tal-akkwist, l-entitajiet kontraenti għandhom jindikaw jekk jawtorizzawx jew jesiġux varjanti u, jekk iva, ir-rekwiżiti minimi li għandhom jiġu milħuqa mill-varjanti u kwalunkwe rekwiżit speċifiku għall-preżentazzjoni tagħhom, b’mod partikolari jekk il-varjanti jistgħux jiġu ppreżentati biss fejn offerta, li ma tkunx varjant, tkun ġiet ippreżentata wkoll.

(3) Fejn ikunu awtorizzati jew rikjesti varjanti, l-entitajiet kontraenti għandhom jiżguraw ukoll li l-kriterji tal-għoti magħżula jistgħu jiġu applikati għall-varjanti li jissodisfaw dawk ir-rekwiżiti minimi kif ukoll għal offerti li jikkonfermaw li mhumiex varjanti.

(4) Fi proċeduri għall-għoti ta’ kuntratti ta’ provvista jew kuntratti ta’ servizzi, l-entitajiet kontraenti li awtorizzaw jew irrikjedew varjanti ma għandhomx jirrifjutaw varjant fuq il-bażi unika li, jekk jintlaqa’, dan iwassal jew għal kuntratt ta’ servizz minflok kuntratt ta’ provvista jew għal kuntratt ta’ provvista minflok kuntratt ta’ servizz.