Regolament 93. Deċiżjonijiet

(1) Wara li jappunta r-rikors għas-smigħ, u wara li jisma’ s-sottomissjonijiet verbali magħmula mill-partijiet kollha, il-Bord ta’ Reviżjoni għandu jistabbilixxi data li fiha jagħti d-deċiżjoni tiegħu f’sessjoni pubblika.

(2) Id-deċiżjonijiet tal-Bord ta’ Reviżjoni jittieħdu preferibbilment fuq bażi ta’ unanimità. Iżda deċiżjonijiet b’maġġoranza jitqiesu bħala d-deċiżjoni finali tal-Bord ta’ Reviżjoni. Iċ-chairman u ż-żewġ membri l-oħra jkollhom vot kull wieħed.

(3) Id-deċiżjoni tal-Bord ta’ Reviżjoni għandha tiġi miktuba, tiġi ffirmata mill-membri kollha u tkun datata. Fid-deċiżjoni tiegħu l-Bord ta’ Reviżjoni għandu jindika r-raġunijiet li għalihom ittieħdet id-deċiżjoni.

(4) Fid-deċiżjoni tiegħu l-Bord ta’ Reviżjoni għandu jirrakkomanda jekk depożitu magħmul minn xi parti għandux jiġi mrodd lura, kollu jew parzjalment, jew le.

(5) Sakemm ma jsirx appell, id-deċiżjoni tal-Bord ta’ Reviżjoni tkun finali u tikkostitwixxi titolu eżekuttiv u tista’ tiġi infurzata skont l-artikolu 273 tal-Kodiċi ta’ Organizzazzjoni u Proċedura Ċivili.