Regolament 90. Setgħat

(1) Il-Bord ta’ Reviżjoni jkollu s-setgħa li jordna jew jippermetti emendi ta’ atti bil-miktub u li jinnomina xi espert biex jassistih fl-investigazzjonijiet tiegħu.

(2) Ikollu wkoll id-dritt li jiddetermina l-proċedura għas-smigħ tal-ilmenti kollha mressqa quddiemu u għandu jiżgura li waqt is-smigħ pubbliku l-partijiet interessati kollha jingħataw l-opportunità li jressqu il-każ tagħhom.

(3) Fid-deċiżjoni tiegħu l-Bord ta’ Reviżjoni jkollu s-setgħa li jħassar il-proċess tas-sejħa jekk huwa jidhirlu li din tkun l-aqwa soluzzjoni fiċ-ċirkostanzi tal-każ; f’dan il-każ l-ebda parti ma jkollha ebda jedd li titlob għad-danni minħabba f’tali deċiżjoni li tiġi mħassra s-sejħa.

(4) Il-Bord ta’ Reviżjoni jkollu d-dritt jieħu dawk il-miżuri temporanji kif jidhirlu xieraq.

(5) Il-komunikazzjonijiet kollha, inklużi dawk li għandhom x’jaqsmu mal-appuntament ta’ każijiet, jistgħu jiġu mgħoddija mill-Bord ta’ Reviżjoni permezz ta’ mezzi elettroniċi.

(6) Il-Bord ikollu s-setgħat kollha li huma vestiti fil-Prim’Awla tal-Qorti Ċivili bil-Kodiċi ta’ Organizzazzjoni u Proċedura Ċivili.