Regolament 58. Gruppi ta’ operaturi ekonomiċi

(1) Gruppi ta’ operaturi ekonomiċi, inklużi assoċjazzjonijiet temporanji, jistgħu jipparteċipaw fil-proċeduri tal-akkwist. Dawn m’għandhomx jintalbu li jkollhom forma legali speċifika mill-awtoritajiet kontraenti sabiex jippreżentaw offerta jew talba ta’ parteċipazzjoni.

(2) Fejn meħtieġ, l-awtoritajiet responsabbli għat-tmexxija tas-sejħa jistgħu jiċċaraw fid-dokumenti tal-akkwist kif gruppi ta’ operaturi ekonomiċi għandhom jissodisfaw ir-rekwiżiti dwar is-sitwazzjoni ekonomika u finanzjarja jew l-ħila teknika u professjonali msemmija fir-regolament 217 dment li dan ikun ġustifikat minn raġunijiet oġġettivi u proporzjonat.

(3) Kwalunkwe kondizzjonijiet għat-twettiq ta’ kuntratt minn tali gruppi ta’ operaturi ekonomiċi, li huma differenti minn dawk imposti fuq parteċipanti individwali, għandhom ukoll ikunu ġustifikati b’raġunijiet oġġettivi u għandhom ikunu proporzjonati.

(4) L-awtoritajiet responsabbli għat-tmexxija tas-sejħa jistgħu jeħtieġu lil gruppi ta’ operaturi ekonomiċi li jassumu forma ġuridika speċifika meta jkunu ingħataw il-kuntratt, kemm-il darba tali bidla tkun meħtieġa għat-twettiq sodisfaċenti tal-kuntratt.