Regolament 209. Talbiet bil-miktub

(1) Ir-rikors għandu jkun fih stqarrija tal-fatti u r-raġunijiet li wasslu għall-black listing. Għandu wkoll ikun fih ukoll kopja tar-rapport dettaljat dwar is-sejbiet tal-investigazzjonijiet imwettqa mid-Direttur tal-Impjiegi u r-Relazzjonijiet Industrijali jew kopja tad-deċiżjoni mogħtija mill-Qorti.

(2) Ir-rikors u d-dokumenti kollha li jsostnu r-rikors għandhom jiġu notifikati lill-konvenut permezz ta’ ittra reġistrata jew ittra uffiċjali li għandu fi żmien għoxrin jum jippreżenta r-risposta. Ir-risposta għandu jkollha wkoll depożitu ta’ erba’ mitt euro (€400) pagabbli lis-Segretarju tat-Tribunal għas-Sanzjonijiet Kummerċjali u għandu jkun fiha d-dokumentazzjoni kollha għas-sostenn tar-risposta.

(3) Jekk l-ittra reġistrata jew l-ittra uffiċjali imsemmija fis-subregolament (2) ma tiġix notifikata lill-konvenut, tkun ir-responsabilità tad-Direttur tal-Impjiegi u r-Relazzjonijiet Industrijali li jieħu ħsieb li kopja tar-rikors u d-dokumenti kollha annessi mar-rikors jiġu notifikati lill-konvenut, u dawn għandhom jiġu notifikati bil-mod ta’ kif għandhom isiru n-notifiki skont l-artikolu 187 tal-Kodiċi ta’ Organizzazzjoni u Proċedura Ċivili. Id-drittijiet imsemmija fil-paragrafu 6 tat-Tariffa A tal-Iskeda A tal-Kodiċi ta’ Organizzazzjoni u Proċedura Ċivili, għandhom japplikaw għal dik in-notifika.

(4) Il-konvenut għandu jara li tiġi notifikata kopja tar-risposta lid-Direttur tal-Impjiegi u r-Relazzjonijiet Industrijali.

(5) It-talbiet bil-miktub għandhom jitqiesu bħala magħluqa meta jiskadi ż-żmien imsemmi fis-subregolament (3).